आरमोरी तालुक्यात 1818 शेतकरी सन्मान निधीपासून वंचित

ई-केवायसी तसेच पोस्टात खाते उघडण्याचे कृषी विभागाचे आवाहन

विधायक दीपस्तंभ वृत्तसेवा
आरमोरी ( जिल्हा गडचिरोली): केंद्र शासनाच्या प्रधानमंत्री किसान सन्मान निधी योजनेअंतर्गत चौदाव्या हप्त्याचा निधी योजनेच्या लाभार्थी शेतकऱ्यांच्या बँक खात्यात जमा करण्यात आला आहे. मात्र या कार्यवाही दरम्यान काही शेतकऱ्यांच्या बँक खात्याची ई-केवायसीसह आधार लिंकिंग नसल्याने तालुक्यातील तब्बल 1818 शेतकरी या निधीपासून वंचित असल्याची माहिती तालुका कृषी अधिकारी कार्यालया अंतर्गत देण्यात आली आहे.

प्राप्त माहितीनुसार, केंद्र शासनाने मागील चार वर्षांपूर्वी शेतकऱ्यांना आर्थिक आधार देण्यासाठी प्रधानमंत्री किसान सन्मान निधी योजना सुरू केली आहे. या योजनेअंतर्गत शेतकऱ्यांना दरवर्षी तब्बल सहा हजार रुपयांचे अनुदान दिले जात आहे. या अनुदानाची एका वर्षात तीन हप्त्यात विभागणी करण्यात आली असून प्रति हप्ता दोन हजार रुपयांचे अनुदान शेतकऱ्यांच्या बँक खात्यात जमा केले जात आहे.

दरम्यान, मागील काही दिवसांपूर्वी तालुक्यातील हजारो शेतकऱ्यांच्या बँक खात्यात या योजनेअंतर्गत चौदाव्या हप्त्याचे अनुदान जमा करण्यात आले आहे. मात्र काही शेतकऱ्यांचे बँक खाते ई-केवायसी तसेच आधार लिंक व राष्ट्रीयकृत बँक खाते नसल्याने तालुक्यातील तब्बल 1818 शेतकऱ्यांना या योजनेचा चौदावा हप्ता मिळाला नसल्याचे सांगण्यात आले.

पोस्टात खाते उघडा

आरमोरी तालुका अंतर्गत प्रधानमंत्री किसान सन्मान निधी योजनेच्या चौदाव्या हप्त्याचे विविध कारणाने अनुदानापासून वंचित शेतकऱ्यांच्या बँक खात्यात अनुदान जमा होण्यासाठी बँक खाते ई-केवायसी करण्यासह आधार लिंक करण्याचे आवाहन करण्यात आले आहे. तरी काही शेतकऱ्यांचे बँक खाते राष्ट्रीयीकृत बँकेत नसल्याने अनुदानाचा हप्ता जमा होण्यासाठी पोस्टात खाते उघडण्याचे आवाहन देखील करण्यात आले आहे.