विद्यामहर्षी ल.दा.कापकर काळाच्या पडद्याआड

आरमोरीत पसरली शोककळा

विधायक दीपस्तंभ वृत्तसेवा
आरमोरी (जिल्हा गडचिरोली): येथील विद्या निकेतन शिक्षण संस्थेचे संस्थापक अध्यक्ष विद्यामहर्षी लक्ष्मणराव दा.कापकर यांचे वृद्धापकाळाने दिनांक १२सप्टेंबर २०२३रोजी निधन झाले.त्यांच्या निधनामुळे आरमोरी परिसरात शोककळा पसरली आहे.

स्व.लक्ष्मणराव कापकर (गुरुजी)यांची प्रारंभीची परिस्थिती अत्यंत बिकट होती.त्या परिस्थितीचा बाऊ न करता शिक्षण क्षेत्रात उल्लेखनीय कार्य करण्याचे उदात्त ध्येय बाळगून त्यांनी विद्या निकेतन शिक्षण संस्थेची स्थापना केली.अथक परिश्रम घेतले व अल्पावधीतच गडचिरोली जिल्ह्यात ते नावारूपास आले होते.शैक्षणिक कार्यासोबतच त्यांनी सामाजिक, सांस्कृतिक, व राजकीय क्षेत्रातही उल्लेखनीय कार्य केले होते.आयुष्यभर त्यांनी निष्ठेने आध्यात्मिक विचारधारा बाळगून जनकल्याणाचे कार्य केले.ते आदर्श शिक्षक, प्राचार्य, साप्ताहिकाचे संपादक, सर्वांशी दिलखुलास संवाद साधणारे स्पष्टवादी व्यक्तिमत्त्व होते.हयातभर त्यांनी साधी राहणी व उच्च विचारसरणीचा अंगीकार केला होता.महान ज्ञानमहर्षी स्वामी विवेकानंद यांचा त्यांच्या जीवनावर प्रभाव होता. अशा अनुभवी, ऋषीतुल्य व्यक्तिमत्वाच्या निधनाने शैक्षणिक, सामाजिक, सांस्कृतिक, आध्यात्मिक क्षेत्रात पोकळी निर्माण झाली आहे.

त्यांचे पार्थिवावर उद्या दिनांक १३-९-२०२३ रोजी ठीक ११वाजता गाढवी नदीवर अंत्यसंस्कार करण्यात येणार आहेत.

त्यांचे पश्चात पत्नी,दोन मुले,मुली,सुना व नातवंडे असा बराच मोठा आप्त परिवार आहे.
_________________________